Ásdís & Kolli: USA 2010
Þessir strákar úr unglingahópnum æfðu áfram í sumar og koma sterkir inn í veturinn
Nú fer vetrarstarfið að hefjast og tökum við á móti nýjum iðkendum í tvo hópa á haustönn. Unglingahópur er fyrir krakka í unglingadeild grunnskólanna (fædd 1995-1997) og svo er annar hópur fyrir 16 ára og eldri (fædd 1994 eða fyrr). Sérstakur skráningardagur verður í byrjun september og auglýst verður um það síðar. Hægt er að ganga frá greiðslu og skráningu símleiðis í 868 2063 (Dagný) fyrir þann tíma.
Unglingahópur æfir kl. 17:00-18:00 mánudaga, þriðjudaga og fimmtudaga. Eldri iðkendur (byrjendur/framhald) æfa sömu daga frá 18:00-19:00.
Björn með gullið
Það var gaman að fylgjast með keppendum á móti Hnefaleikafélags Hafnarfjarðar (HFH) í kvöld, bæði því hvað þeir voru allir vel skólaðir og hversu tært boxið var. Allar viðureignirnar voru mjög jafnar.
Hér eru úrslitin (sigurvegarar eru feitletraðir):
Björn Snævar Björnsson (HFR) vs Hafsteinn Smári Óskarsson (HFR)
Berglind Frances Aclipen (HFÆ) vs Valgerður Guðsteinsdóttir (HFÆ)
Hinrik R. Helgason (HFÆ) vs Sigurbjörn Richter (HFH)
Elías Shamsudin (HFÆ) vs Daníel Hauksson (HFH)
Björn Snævar Björnsson (HFR) vs Axel Logi Þorsteinsson (HFÆ)
Gunnar Gray (HFÆ) vs Kristján Orri Arnarsson (HFH)
Daníel Hauksson (HFH) - Hnefaleikamaður kvöldsins
Jón Þór Jakobsson, Aron Ingi Gestsson og Leó Smári Sigurjónsson ásamt Gunnari Davíð Gunnarsyni þjálfara
Fyrri hluti hnefaleikamótsins í Hafnarfirði fór fram í dag, en þar voru 5 diplomaleikir. Keppendurnir okkar þrír komu allir heim með ný diploma. Í kvöld kl. 20:00 verður svo keppt í áhugamannahnefaleikum á sama stað, Dalshrauni 10. Aðgangseyrir er 1.000 kr.
Ásdís og Lucia Rijker
Ásdís var svo heppin að fá að hitta bestu hnefaleikakonu sögunnar, Luciu Rijker, í Wild Card Gym í gær, en þjálfari hennar var og er einmitt sjálfur Freddie Roach. Lucia er ósigruð í atvinnuhnefaleikum og muay thai og er goðsögn í heimi bardagaíþróttanna. Þegar hún var upp á sitt besta neituðu stærstu stjörnur kvennahnefaleikanna, Christy Martin og Laila Ali (sem er þó mun hærri og þyngri), að mæta henni í hringnum. Þessi öflugi frumkvöðull hefur veitt fjölda upprennandi hnefaleikakvenna innblástur gegnum tíðina og er Ásdís engin undantekning.
Hér eru nokkur brot úr heimildamynd sem gerð var árið 1999 til þess að vekja athygli á baráttu hnefaleikakvenna fyrir sinni íþrótt þar sem Lucia er tekin fyrir, og svo viðtal við Luciu þegar í ljós kom fyrir nokkrum mánuðum að loks yrði keppt í kvennaflokki á Ólympíuleikunum.
Filed under: Myndir
Það var tekið grimmdarlega á því í kvöld!
Filed under: Myndir
Unglingahópurinn ásamt Gunnari Davíð þjálfara.
Ásdís og Kolli á flugvellinum
Ásdís Rósa Gunnarsdóttir (HFR) lagði í dag af stað í tveggja mánaða æfingaferð til Bandaríkjanna þar sem hún verður undir handleiðslu Freddie Roach og félaga í Wild Card Gym. Með henni í för er Gunnar Kolbeinn Kristinsson (HFÆ).
Hægt verður að fylgjast með Ásdísi og Kolla á bloggsíðu þeirra um ferðina: Smellið hér.
Ásdís Rósa Gunnarsdóttir og Hafsteinn Smári Óskarsson
Þau Hafsteinn Smári Óskarsson og Ásdís Rósa Gunnarsdóttir, bæði frá Hnefaleikafélagi Reykjaness (HFR), voru í kvöld valin Hnefaleikamaður og Hnefaleikakona ársins 2009 í hófi ÍSÍ á Grand Hótel í Reykjavík.
HNEFALEIKAMAÐUR ÁRSINS 2009
Hafsteinn Smári Óskarsson
Hafsteinn Smári hefur verið ósigrandi í hringnum síðan haustið 2008. Frá því um áramótin síðustu hefur hann mætt og unnið sigur á öllum íslenskum keppinautum sínum í fjórum þyngdarflokkum, sem er óheyrt.
Á Íslandsmótinu sigraði hann Elías Shamsudin frá Hnefaleikafélaginu ÆSIR (HFÆ) og varð Íslandsmeistari í léttvigt (60 kg). Hann sigraði einnig besta léttveltivigtarboxara landsins (64 kg), Adam Frey Daðason frá Hnefaleikafélagi Hafnarfjarðar (HFH), Gunnar Georg Gray (HFÆ), Íslandsmeistarann í veltivigt (69 kg) tvívegis og nú síðast besta millivigtarboxarann (75 kg), Kristján Orra Arnarsson (HFH) þrátt fyrir að á þeim væri um 10 kg þyngdarmunur. HFH tók ekki þátt á Íslandsmótinu þetta árið og er það einungis af þeim sökum sem þeir Adam og Kristján eru ekki Íslandsmeistarar.
Hafsteinn vann einnig yfirburðasigur á Vilhjálmi Gunnar Péturssyni (HFÆ) í 69 kg flokki, þrátt fyrir nokkurn þyngdarmun og 13 ára aldursmun (Hafsteinn er 15 ára). Það er ólíklegt að það verði nokkurn tímann leikið eftir honum.
Hafsteinn er íþróttamaður fram í fingurgóma og hefur aldrei hopað undan nokkurri áskorun. Af þessum sökum er hann útnefndur Hnefaleikamaður ársins 2009.
HNEFALEIKAKONA ÁRSINS 2009
Ásdís Rósa Gunnarsdóttir
Það eru fáar íslenskar hnefaleikakonur sem hafa stigið eins oft í hringinn á einu ári og Ásdís Rósa gerði á árinu. Til þess hefur hún oftast nær þurft að berjast utan síns eiginlega þyngdarflokks, fjaðurvigtar (57 kg).
Í janúar mætti hún í öðrum bardaga sínum á ævinni þriðju bestu léttvigtarkonu (60 kg) Danmerkur, Maríu Jacobsen. Ásdís fór allar loturnar og stóð sig bara nokkuð bærilega miðað við töluverðan reynslu- og þyngdarmun. Hún nýtti reynsluna og stóð sig fantavel þegar hún mætti loksins einhverjum í sínum eigin þyngdarflokki, Lindu Dögg Guðmundsdóttur (HFÆ) og hafði betur á stigum á móti í mars. Þær
mættust svo aftur á Íslandsmótinu mánuði síðar og í þetta sinn vann Ásdís fullnaðarsigur þegar viðureignin var stöðvuð í annarri lotu.
Ekki gekk að finna Ásdísi andstæðing á Ljósanótt, þannig að hún bætti það upp með því að keppa fjórum sinnum á sex vikum í október og nóvember! Hún tók þríleik við veltivigtarkonuna (66 kg) Berglindi Frances Aclipen (HFÆ) og voru allir leikirnir jafnir og skemmtilegir. Ásdís sigraði þann fyrsta, en Berglind þann annan og þriðja líka, þótt sá síðasti hefði líkast til getað farið hvernig sem er. Á milli stríðanna við Berglindi fór hún til Danmerkur og mætti léttvigtarkonunni (60 kg) Nínu Jørgensen. Sú hefur átta ára reynslu af hnefaleikum og vann sigur á stigum.
Ásdísi Rósu er kjörin Hnefaleikakona ársins 2009 á þeim forsendum að hún er þrátt fyrir allt ósigruð í sínum þyngdarflokk, varð Íslandsmeistari á árinu, hefur stigið í hringinn oftar en flestir keppendur af báðum kynjum og er frábær íþróttamaður sem hefur sýnt mikinn metnað og framfarir á árinu öllu frá upphafi til enda.
Ásdís stefnir á þátttöku á Ólympíuleikunum í London 2012 og ætlar næstu tvo mánuðina út til Bandaríkjanna í æfingabúðir hjá Freddie Roach og félögum í Wild Card Gym.
Hnefaleikafélag Reykjaness óskar Hafsteini og Ásdísi innilega til hamingju með titlana og hlakkar til stærri og enn betri hluta á nýju ári!
